Grupo de Teoría da literatura e Literatura comparada da USC

Benvida, benvido á páxina do grupo de investigación en Teoría da Literatura e Literatura Comparada (GI-1371), pertencente ao Departamento de Lingua e Literatura Españolas, Teoría da Literatura e Lingüística Xeral da USC. Neste espazo ofrecemos a oportunidade de coñecer mellor o traballo do noso equipo, as nosas liñas de investigación e as publicacións e actividades que leva a cabo o grupo.

Actividades

  • Encontros do Grupo de Teoría da literatura e Literatura comparada

    18 de outubro de 2022

    Próxima realización dun “Encontro do Grupo de Teoría da literatura e Literatura comparada” para o día 18 de outubro de mañá (10:00-14:30) na Faculdade de Filoloxía (aula B13). Un encontro entendido como unha valiosa oportunidade para dialogar con colegas que traballan nunha liña afín aos intereses do alumnado e profesorado desta facultade como é, neste caso, a perspectiva de xénero e a literatura escrita por mulleres.

     
  • IX Simposio ASETEL: "Pensar os medios: xéneros, dispositivos e estratexias"

    7 - 8 outubro 2021

    As actividades do IX Simposio de ASETEL (conferencias, ponencias e debates) tratarán do indubidable contaxio teórico-práctico entre a literatura e outros medios de comunicación, da idea de novidade que adoita aparecer en calquera interrogación sobre os new media máis alá do soporte analóxico ao dixital, da brevidade como espazo privilexiado para a xenología que nos obriga a cuestionar o aspecto «material» e pragmático do concepto de literatura, e do estado das investigacióms literarias e culturais baixo unha óptica global.

    O IX Simposio de ASETEL atende estes asuntos e ofrécese como espazo de reflexión sobre a actualidade e visibilidade da propia disciplina na sociedade dos medios; as relacións intermediais e transxenéricas en contornos e formatos que nos obrigan a cuestionarmos determinadas concepcións auráticas e institucionais da literatura; o debate terminolóxico e clasificatorio das formas breves contemporáneas, as súas coordenadas transxenéricas, o seu carácter híbrido e a súa apertura a fenómenos tecnomediáticos; e os aspectos socioeconómicos e culturais que condicionan os estudos literarios desde distintas perspectivas (estadounidense, europea e española).

     

    Coordinadores: Anxo Abuín González, Paulo Antonio Gatica Cote e María do Cebreiro Rábade Villar.

     

    Sede do Simposio: Facultade de Filoloxía (Salón de actos), Universidade de Santiago de Compostela

Novas

  • Maternidades virtuosas. Unha crítica aos modelos profesionais de crianza. Novo libro de María do Cebreiro Rábade

    Premio Ramón Piñeiro de Ensaio 2021 Na sociedade actual a maternidade concíbese como un extenso campo simbólico, a miúdo moi polarizado, que vén disparando un inxente corpus de produción verbal, que aquí denominamos “xiro discursivo da maternidade”. Esta mudanza non podería entenderse sen a perda da transmisión directa da experiencia de ser nai, acrecentada por dous feitos de alta incidencia en Galicia: o decrecemento progresivo da natalidade e o atraso da idade á que as mulleres teñen o seu primeiro fillo. Estes factores contribúen a explicar a transferencia dunha serie de modelos extraídos do mundo do traballo no réxime neoliberal ás tarefas da crianza. Explorar os novos dispositivos parentais, e as súas implicacións colectivas, é o principal obxectivo deste ensaio, que entra en diálogo con clásicos da literatura feminista, ao tempo que tenta explorar os límites da dimensión confesional do xénero.

Publicacións